Isin Gumi Anggara : MOS, Megentos Masa Pengenalan Lingkungan Sekolah (MPLS)

Redaksi Singaraja FM 15/07/2016 0

MOSMasa Pengenalan Lingkungan Sekolah (MPLS) rahina Soma wau lintang kekawitin. Program puniki ngentosin istilah Masa Orientasi siswa (MOS), riantukan sedurungnyané kasub medaging kekerasan lan ngawé ibuk para siswa. Yéning ring MOS kantun kepanggihin wéntennyané perpeloncoan majeng para siswa anyar sané kelaksanayang kakak kelasnyané, kémahon ring MPLS mangkin lewih ring pengenalan para siswa anyar sareng lingkungan sekolah anyarnyané. Indik puniki manut sareng ketentuan sane kegarisang Perméndikbud Nomor 18 warsa 2016. Paindikan punika kabligbagang ring sajroning acara Isin Gumi Radio Singaraja FM 92,0 Mhz rahina Anggara, 12 Juli 2016.

Gung Surya, Lovina
Wantah becik pisan program anyar punika, MOS kagentosin MPLS tiang merasa gargita banget. Yéning dumun MOS akéh kedagingin sané tan patut, minekadi siswa anyar katuntut ngarereh barang-barang sané kawéntenanyané langka. Nike sané ngawinang siswa merasa beban lan tertekan, lianan punika para orang tua sareng taler ibuk pisan. Yéning mangkin MPLS sinah ngawinang orang tua merasa lega wantah mikayunin naur jinah pangkal.

Nengah Sudix, Seririt
Cumpu pisan MOS kagentosin MPLS ring warsa ajaran kadi mangkin, puniki wantah pidabdab lewih maju saking Menteri Pendidikan. Yéning kayunin becik-becik MOS sané dumun punika sujatinyané doh pisan mepaiketan sareng papelajahan ring sekolah. Yéning mangkin siswa anyar wantah katuntun nguningin lingkungan sekolah, indik program sekolah, miwah sapunapi caranyané melajah sane becik.

Tanaya, Kapung Tinggi
Ring Masa Pengelanan Lingkunan Sekolah pinaka pegentos MOS, becikné kaselipang ajaran indik sapunapi ngelestariang budaya Bali. Minekadi para siswa anyar keajain ngaryanin canang, klakat utawi pénjor miwah serana upakara tiosan. Indik puniki pacang lewih maguna saihang sekadi MOS sané dumun.

Aji Bima, Banjar
Tiang cumpu pisan Masa Pengelan Lingkungan Sekolah kaedohang saking parilaksana kekerasan fisik. Iriki lewih becik nelebang ring pengenalan sekolah lan kegiatan sané mepaiketan sareng kemanusiaan. MPLS patut mangda lewih katuntun ring indik-indik sané maubungan sareng dunia pendidikan.

Putri, Jl. Kutilang Singaraja
Pinaka orang tua tiang gargita pisan antuk program anyar puniki. Para siswa lan orang tua taler lewih tenang, seneng lan tan ibuk pisan sekadi dumun-dumun. Melalapan program MPLS puniki dumogi jagat pendidikan lewih asilnyané kapungkur wekas. Lianan punika program MPLS sida ngelantur .(ama)

Leave A Response »