Isin Gumi : Pewangunan Ring Bali Nénten Terkontrol

Redaksi Singaraja FM 15/05/2017 0

ilustrasi

Bali pinaka daérah tetujon wisata, taler kenobatkan dados kawasan wisata pinih becik ring dunia, janten pewangunannyané kalintang pesat. Tiosan punika pewangunan akomodasi wisata nerus ngelimbak. Kémahon, pewangunan ring Bali kadi mangkin sampun nénten terkontrol. Pewangunan sané
nénten terkontrol punika akéhan wénten ring séktor pariwisata. Pakar Green Building utawi wangunan ramah lingkungan Deddy Kurniawan Halim negesang indik punika ring Jimbaran wau-wau puniki. Paindikan punika kabligbagang ring sajroning acara Isin Gumi Radio Singaraja FM 92,0 Mhz rahina Anggara, 09 Méi 2017

Komang Yasa, Lovina
Manut titiang yéning sampun kauningin pewangunan nénten terkontrol gelis keambil pidabdab antuk tegas olih pihak sané wenang. Sampunang kantos suwé tan kauratiang. Riantukan pacang ngawesanayang paindikan tan becik kapungkurnyané.

Wiguna, Sambangan
Yéning akéh pewangunan sané melanggar tan nganutin aturan sekadi mangkin, minabang pengawasannyané kantun kirang pisan. Yéning para pejabat inucap sampun tegas sepatutnyané tan wénten malih pelanggaran. Diastun umpami sampun kewangunan kayun tan kayun patut kebongkar.

Putu Karsini, Banjar
Lahan-lahan ring Bali sampun sayan telas lan cupit, tunas titiang mangda usanang sampun ngewangun akomodasi pariwisata, napi malih tan nganutin awig-awig ring Bali. Para wisatawan kayun rauh ke Bali sujatiné mangda sida ngantenang kewéntenan keasrian alam Bali. Boya wangunan metingkat-tingkat.

Putra, Seririt
Indik aturan-aturan rikala ngewangun ring Bali sampun wénten. Pantarannyané mangda nganutin Tri Hita Karana. Kapungkur indik puniki mangda banget kauratiang minekadi tan ngewangunan akomodasi perhotélan ring lahan sané suci. Samian punika kaperluang ketegasan sang pemimpin daérah. ( ama )

Leave A Response »