Isin Gumi : Marak, Wangunan Gedung Tanpa Arsitéktur Bali

Redaksi Singaraja FM 10/02/2017 0

Kabupatén Buléléng ngawit warsa 2015 sané lintang nerapang Peraturan Daérah Perda No. 1 Warsa 2015 indik Bangunan Gedung. Régulasi puniki kekaryanin antuk mengatur desain wangunan instansi pemerintah lan wangunan gedung druén swasta mangda nyiriang arsitéktur Bali (stil Bali). Sayang, perda puniki nénten ubahnyané “macan ompong” mawinan perda punika durung keuratiang secara penuh. Pihak sané ngewangun gedung nguningayang makudang alasan nénten ngemiletin isi perda punika. Ngawit saking perda pinaka produk ukum tergolong anyar, kantos maelnyané prabéa ngewangun wangunan ngawigunayang arsitéktur Bali. Indik punika kebaosang Kepala Dinas Pekerjaan Umum dan Penataan Ruang (PU-PR) Kabupatén Buléléng Ketut Suparta Wijaya wau puniki. Paindikan punika kabligbagang ring acara Isin Gumi Radio Singaraja FM 92,0 Mhz rahina Anggara, 31 Januari 2017

Putu Gama, Patemon
Riantukan perda punika tergolong baru, sepatutnyané kasobyahang dumun secara nerus mangda samian kahanan nguningin. Yéning sampun samian uning sinah élah nerapang perda inucap. Lianan punika patut kategasang majeng instansi pemerintah lan swasta yéning ngewangun gedung mangda nganutin daging perda inucap.

Gung De, Jl. Ngurah Rai Singaraja
Mangda perda punika prasida katerapang utamané majeng instansi pemerintah lan swasta, patut kekaryanang saksi sané tegas. Yéning instansi pemerintah sinah meresidayang ngewangun antuk arsitéktur Bali. Kémahon yéning instansi swasta tan nguratiang utawi tan nerapang perda punika kakeniang sanksi, minekadi rikala ngurus ijin IMB tan kaicénin.

IB. Arpana, Sukasada
Tetujon perda punika yuktiné becik pisan inggih punika ngajegang lan ngelestariang stil Bali pinaka warisan leluhur. Arsitéktur Bali taler silih sinunggil sané prasida nudut manah para wisatawan rauh melancaran ring Bali. Mawinan sampun patut pisan samian komponén sareng meperan antuk ngelestariang.

Adi Putra, Lovina
Tiang merasa bangga majeng pamerintah sampun ngaryanang perda indik ngelestariang arsitéktur Bali.Diastun akéh piambeng sané kearepin minekadi tan samian sané ngewangun gedung punika krama Bali meagama Hindu, lan taler antuk maelnyané prabéa pewangunan antuk arsitéktur Bali. Kémahon indik punika sampun wénten upaya sané mabuat pisan.(ama)

Leave A Response »