Isin Gumi : Penyiuan Kartu Indonésia Séhat (KIS), Nénten Terdistribusikan

Redaksi Singaraja FM 20/01/2017 0

Pendistribusian Kartu Indonésia Séhat (KIS) antuk ribuan masyarakat Kabupatén Buléléng sasih puniki sampun puput kelaksanayang pemkab ngelintang Dinas Sosial. Kémahon ribuan KIS kewaliang, silih sinunggilnyané riantukan penerimanyané sampun padem. Kepala Dinas Sosial Gede Komang, wau puniki nguningayang pendistribusian KIS sampun kelaksanayang ngawit tanggal 1 Januari 2017. Kuota kartu sané kecétak kantos 86.258. Kémahon medasar laporan saking petugas wénten 8.632 kartu sané muali. Pantarannyané wénten sané sampun padem,wénten sampun pindah alamat, lan sampun medué kartu. Paindikan punika kabligbagang ring acara Isin Gumi Radio Singaraja FM 92,0 Mhz rahina Anggara, 17 Januari 2017

Gung Surya, Lovina
Wéntennyané krama sané ngamolihang KIS sampun padem minabang pendataan ring tingkat désa kirang cermat. Mawinan patut kewawanin malih ngelaksanayang pendataan, napi malih kantun wénten sisa kuota sané mewali. Tiosan punika kartu KIS banget kabuatang krama pinaka pagentos kartu JKBM.

Kaki Dukuh, Seririt
Katunas majeng aparat ring désa-désa mangda yakti sumeken mepaiketan pendataan kramanyané. Mangda kauningin warga sané sampun padem, sané sampun pindah, utawi sampun medué kartu. Yuktiné
kantun akéh masyarakat ngaptiang mangda prasida ngamolihang Kartu Indonésia Séhat sané banget mawiguna rikala warga nedeng sungkan.

Gung De, Jl. Ngurah Rai Singaraja
Keséhatan pinaka paindikan sané meaji pisan ring kauripan puniki. Mawinan wéntennyné program Kartu Indonésia Séhat kerasayang banget ngewantu para warga masyarakat napi malih sané kawéntenannyané tuara. Aparat katunas rikala mendata masyarakatnyané mangda yakti tedun langsung ngerauhin, mangda polih data sané sumeken.

Putu Gama, Patemon
Kantun akéh kartu KIS sané muali, tunas titiang kuota punika kaicénin majeng warga sané durung ngamolihang medasar vérifikasi sedurungnyané. Lianan punika saking Dinas Sosial mangda nyobyahang ke masyarakat sapunapi warga sané sedurungnyané medué JKBM napiké otomatis kagentosin KIS.(ama)

Leave A Response »